एस् ए एन् एन् न्यूज
कान्ति बाल अस्पताललाई १००० शय्यामा बिस्तार गर्ने कार्यमा सहयोग गर्न स्वास्थ्य तथा जनसंख्या मन्त्री प्रदीप पौडेलले जापानलाई आग्रह गरेका छन् ।
नेपालका लागि जापानी राजदूत तोरु मायदासँगको भेटमा मन्त्री पौडेलले सहयोगका लागि आग्रह गरेका हुन् । बालबालिकाको उपचारका लागि विशिष्टिकृत अस्पताल भए पनि पर्याप्त पूर्वाधार नभएकाले सरकारको योजनामा साथ दिन पौडेलले राजदूतसमक्ष आग्रह गरेको मन्त्री पौडेल सचिवालयले जानकारी दिएको छ ।
भेटका क्रममा उनले मन्त्रालयले घोषणा गरेको एक्सरे फिल्म प्रयोग निरुत्साहित गरेर डिजिटल कपी वितरण गर्ने योजनामा समेत जापान सरकारबाट सहयोगको अपेक्षा गरेको बताएका थिए ।
मन्त्री पौडेलको आग्रहपछि राजदूत मायदाले अस्पताललाई सघाउन सकारात्मक रहेको बताएको मन्त्री पौडेलको सचिवालयले जनाएको छ । मन्त्री पौडेलले कान्ति बाल अस्पतालको क्षमता विस्तार गरेर बढी क्षमतामा प्रभावकारी बाल उपचार उपलब्ध गराउने योजना सार्वजनिक गरेका थिए ।
त्यसलाई सफल पार्न विभिन्न क्षेत्रसँग सहकार्य र संवाद भइरहेको छ । यसैक्रममा जापान सरकारसँग सहकार्यको विकल्पबारे खोजी भएको मन्त्री पौडेलको सचिवालयले उल्लेख गरेको छ ।
