एस् ए एन् एन् न्यूज
नेकपा एमालेका सांसद ऐन महरले पूर्वप्रधानन्यायाधीश चोलेन्द्र शमशेर जबरालाई पक्राउलाई लिएर सरकारको आलोचना गरेका छन्। प्रतिनिधि सभाको बैठकमा बोल्दै सांसद महरले जबरालाई पक्राउ गर्ने क्रममा सरकारले कानुनी शासन र विधिको शासनको उल्लंघन गरेको आरोप लगाए । उनले जबरालाई ‘गुण्डागर्दी तथा अपहरण शैलीमा’ पक्राउ गरिएको दाबी गर्दै यसले राज्य आतंकको अवस्था सिर्जना गरेको आरोप लगाए।
उनले भने,‘कोही व्यक्तिले कानुन हातमा लिने वा कानुन मिच्ने काम गरेको छ भने, जोसुकै भए पनि उसमाथि अभियोग लगाई तथ्य र प्रमाणका आधारमा पक्राउ गरेर कानुनी दायरामा ल्याउनुपर्छ। यसमा हामी सहमत छौँ। तर, सरकारले पटक–पटक पूर्वाग्रह र प्रतिशोधका आधारमा तथा आफ्नो विरोध गरेका कारण व्यक्तिहरूलाई तर्साउने, धम्काउने, पक्राउ गर्ने र हुर्मत लिने काम गरिरहेको छ। यो कानुनी राज्य र विधिको शासनको बर्खिलापमा छ।’
