एस् ए एन् एन् न्यूज
रौतहट । रौतहटको सदरमुकाम गौरसँग सीमा जोडिएको भारतको बिहारस्थित सीतामढी जिल्लाको बैरगनिया प्रखण्डमा धान खेतमा बिछ्याइएको खुला विद्युतीय तारबाट करेन्ट लागेर तीन जनाको मृत्यु भएको छ।
बैरगनिया प्रखण्डअन्तर्गत अख्ता पश्चिमी चकवा पञ्चायत–५ स्थित तकिया टोलमा शनिबार बिहान भएको घटनामा तीन स्थानीयवासीको घटनास्थलमै मृत्यु भएको हो। करेन्ट लागेर अन्य तीन जना गम्भीर घाइते भएका छन्। उनीहरूको स्थानीय अस्पतालमा उपचार भइरहेको बताइएको छ।
घटनास्थलमा दुई वटा जंगली बँदेलसमेत मृत अवस्थामा फेला परेका छन्। प्रारम्भिक विवरणअनुसार खेतमा जंगली जनावरबाट बाली जोगाउन खुला विद्युतीय तार बिछ्याइएको हुन सक्ने आशंका गरिएको छ।
भैंसी खोज्न खेततर्फ पुगेकालाई विद्युतीय तारबारे जानकारी नभएका कारण ठूलो दुर्घटना भएको बताइएको छ।
