विश्वविद्यालयमा हुने राजनीतिक हस्तक्षेप र भागवण्डा चार वर्षभित्र अन्त्य गर्ने शिक्षामन्त्रीको घोषणा

शिक्षा तथा खेलकुदमन्त्री सस्मित पोखरेलले विश्वविद्यालयमा कायम रहेको राजनीतीकरण पूर्ण रूपमा अन्त्य गर्ने बताएका छन् । बिहीबार त्रिभुवन विश्वविद्यालयको ६७औँ वार्षिकोत्सवका अवसरमा आयोजित समारोहलाई सम्बोधन गर्दै शिक्षामन्त्री पोखरेलले आउँदो ४ वर्षभित्र विश्वविद्यालयलाई राजनीतिक हस्तक्षेपमुक्त बनाइने घोषणा गरे ।

उनले भने, ‘विश्वविद्यालयमा हुने राजनीतीकरणलाई अबको चार वर्षभित्र पूर्ण रूपमा अन्त्य गर्नेछौँ,’ पोखरेलले भने । साथै विश्वविद्यालयको समग्र सुधारका लागि राजनीतिक स्वार्थभन्दा माथि उठेर काम गर्ने प्रतिबद्धतासमेत मन्त्री पोखरेलले गरेका छन् ।

अबका दिनमा राजनीतिक भागवण्डाका आधारमा नभई योग्यता र क्षमताका आधारमा विश्वविद्यालयको टिम निर्माण हुने उनको भनाइ छ । विश्वविद्यालयमा अब कुनै पनि प्रकारको राजनीतिक हस्तक्षेप नहुने र नियुक्ति, सरुवा वा बढुवा जस्ता प्रशासनिक कार्यमा पनि राजनीतिक दबाब दिने परिपाटीको अब अन्त्य गर्ने उल्लेख गरे ।

‘अब विश्वविद्यालयको नेतृत्व र टोली भागवण्डाको राजनीतिका आधारमा होइन, मेरिटोक्रेसीका आधारमा निर्माण हुनेछ,’ उनले भने, ‘विश्वविद्यालयमा अब कुनै पनि प्रकारको राजनीतिक हस्तक्षेप हुनेछैन, कसैलाई कहाँ राख्ने, सरुवा गर्ने, बढुवा गर्ने वा नियुक्ति गर्ने जस्ता निर्णय राजनीतिक दबाबका आधारमा गरिने छैनन् ।’

मन्त्री पोखरेलले विश्वविद्यालयको प्राज्ञिक वातावरण सुधारका लागि आफ्नो मन्त्रालय दृढ रहेको उल्लेख गर्दै कतैबाट राजनीतिक दबाब आए तुरुन्त मन्त्रालयलाई जानकारी गराउन आग्रह गरे । आफ्नै दल वा अन्य कुनै पनि राजनीतिक दलबाट आउने अनुचित दबाबलाई रोक्न र विश्वविद्यालयको स्वायत्तता जोगाउन सरकारले पूर्ण रूपमा सुरक्षा प्रदान गर्ने विश्वाससमेत मन्त्री पोखरेलले व्यक्त गरे ।