एस् ए एन् एन् न्यूज
४५ औं अन्तराष्ट्रिय महिला हिंसा अन्त्य दिवसको सन्दर्भ पारेर संचारिका समूह नेपालको आयोजनामा साहित्यमा नारीवादः नयाँ दृष्टिकोणको खोजी छलफल कार्यक्रम आज प्रज्ञा भवन कमलादीमा सम्पन्न भएको छ ।
साहित्यमा नारीवादको अवस्था, पहुँच, चुनौति तथा अवसरलाई पहिचान गर्दै विगत, वर्तमान र भविष्यका पक्षमा साहित्यकारहरुसँग सामुहिक छलफल गरिएको हो ।
साहित्यमा नारीवादको विषयमा प्रख्यात साहित्यकार र अनुवादक मन्जुश्री थापा, प्राध्यापक, लेखक र अनुसन्धानकर्ता अरुण गुप्तो र कवि र फिल्म निर्माता उपेन्द्र सुब्बासँग विशेष छलफल गरिएको थियो ।
कार्यक्रमका प्रमुख अतिथि संस्कृति तथा पर्यटनमन्त्री बद्री पाण्डेले कार्यक्रममा बोल्दै देशमा राजनीतिकले फड्को मारिसके लगतै देशले राष्ट्रपति, सभामुख, प्रधानन्यायधिश, मुख्य सचिव पाई सकेको र अब प्रधानमन्त्री र कुलपति महिला बनाउन बाँकी रहेको बताए । देशमा राजनीतिक परिवर्तनसँगै समाज जागृत हुन सके पक्कै पनि राज्यको हरेक तह र तप्कामा महिलाहरुको न्यायपूर्ण ढंगले सहभागिता हुने बताए।
उनले साहित्यमा नारीवादः नयाँ दृष्टिकोणको खोजी नामक छलफलमा आफ्नो धारणा राख्दै पछिल्लो पटक महिलाहरुको साहित्यमा पनि सहभागिता बढेको बताउँदै नारीवादभित्र समस्या, चूनौति र सम्भावनाका ढोकाहरु कहाँ–कहाँ छन् र राज्यले बनाएका संघसंस्थाहरु तथा नीजि संस्थाहरु पनि जागृत हुनु पर्नेमा जोड दिए । मन्त्री पाण्डेले समाजमा दविएका अन्तरकुन्तर विषयलाई सबैका सामु ल्याउने काम पनि साहित्यले गर्ने हुँदा साहित्य क्षेत्रलाई कानुनी रुपमै बलियो बनाउनु पर्ने बताए ।
त्यसैगरी कार्यक्रममा बोल्दै विशिष्ट अतिथि प्रसिद्ध कवि तथा नेपाल प्रज्ञा प्रतिष्ठानका कुलपति भुपाल राईले साहित्य क्षेत्रमा विगतमा भन्दा पछिल्लो समय महिलाहरुको सहभागिता बढ्दै आएको बताए । साहित्य क्षेत्र कुनै जातजाति, वर्ग क्षेत्रको मात्र नभई यसको महत्व र पहुँच बुझ्न सके देशलाई नै परिवर्तन गर्न सक्ने बताए ।
साहित्यमा नारीवादः नयाँ दृष्टिकोणको खोजी छलफल कार्यक्रमको सहजीकरण पत्रकार निमा काफ्नेले गरेकी थिइन् भने कार्यक्रमको अध्यक्षता संचारिका समूह नेपालका अध्यक्ष एवंम सक्रिय पत्रकार तथा लेखक बिमला तुम्खेवाले गरेकी हुन् । उक्त छलफल कार्यक्रममा साहित्यकार तथा पत्रकारहरुको सहभागिता रहेको थियो भने कार्यक्रममा साहित्यमा नारीवादः नयाँ दृष्टिकोणको खोजीका विषयमा सामुहिक छलफल समेत भएको थियो । सो कार्यक्रम संचारिका समूह नेपाल र नेपाल प्रज्ञा प्रतिष्ठानको सहकार्यमा भएको हो ।
