एस् ए एन् एन् न्यूज
सीमा विवादसम्बन्धी प्रधानमन्त्री बालेन शाहको अभिव्यक्तिलाई लिएर उठेको प्रश्नमा परराष्ट्रमन्त्री शिशिर खनालले संसदमा स्पष्टिकरण दिएका छन्। उनले प्रधानमन्त्रीको भनाइलाई ‘क्रस बोर्डर अकुपेसन’ सन्दर्भमा बुझ्नुपर्ने बताएका छन्। गत जेठ १७ गते प्रतिनिधिसभामा सांसदहरूको प्रश्नको जवाफ दिने क्रममा प्रधानमन्त्री शाहले नेपालले मात्रै होइन, भारतले पनि नेपालतर्फको भूमि मात्र नभई नेपालले समेत भारततर्फ केही स्थानमा जमिन मिचेको बताएका थिए। सो अभिव्यक्तिलाई लिएर विपक्षी दलहरूले संसदमा आपत्ति जनाउँदै आएका छन्।
यस विषयमा बुधबार परराष्ट्रमन्त्री खनालले सरकारको आधिकारिक धारणा राख्दै सीमा विवाद संवेदनशील र जटिल विषय भएको उल्लेख गरे। उनले नेपालले लिपुलेकमार्फत भारतद्वारा मानसरोवर यात्रा सञ्चालन गरिएको विषयमा कूटनीतिक नोट पठाइसकेको र भारतले त्यसको जवाफ समेत दिएको जानकारी दिए। मन्त्री खनालका अनुसार नक्सांकन नभएका केही क्षेत्रबाहेक दशगजा क्षेत्रमा अतिक्रमणसम्बन्धी समस्या अझै कायम छ। उनले सीमा विवादलाई कूटनीतिक माध्यमबाट समाधान गर्न सरकार प्रतिबद्ध रहेको पनि स्पष्ट पारे।
साथै, नेपाल-भारत सीमा मामिलामा तेस्रो मुलुकको संलग्नता नखोजिएको बताउँदै प्रधानमन्त्रीले दिएको अभिव्यक्ति प्रमाण संकलन र विभिन्न पक्षसँगको संवादका आधारमा आएको धारणा भएको उनको भनाइ थियो। सीमा विवादलाई राजनीतिक विषयभन्दा बढी कूटनीतिक प्रक्रियाबाट समाधान गर्न सरकार तयार रहेको परराष्ट्रमन्त्री खनालले दोहोर्याएका छन्।
