एस् ए एन् एन् न्यूज
सामाजिक सञ्जालमा केपी शर्मा ओलीलाई राष्ट्रिय स्वतन्त्र पार्टी (रास्वपा) को सदस्यका रूपमा देखाइएको फर्जी पोस्टर व्यापक रूपमा फैलिएको विषय प्रतिनिधिसभामा उठाइएको छ।
प्रतिनिधिसभा बैठकमा बोल्दै यशोदा बराल ले एमाले अध्यक्ष ओलीको नाम र तस्बिर प्रयोग गरी तयार गरिएको नक्कली पोस्टर सामाजिक सञ्जालमा भाइरल बनाइएको भन्दै आपत्ति जनाइन्। उनले यस्ता भ्रामक सामग्री निर्माण तथा प्रसारण गर्ने व्यक्तिहरूमाथि छानबिन गरी कानुनी कारबाही गर्न सरकारसँग माग गरिन्। बरालले सामाजिक सञ्जालको दुरुपयोग गर्दै राजनीतिक व्यक्तित्व र दलहरूको छवि प्रभावित पार्ने उद्देश्यले फर्जी सामग्री फैलाउने प्रवृत्ति बढ्दै गएको उल्लेख गर्दै यस्ता गतिविधिलाई नियन्त्रण गर्न सम्बन्धित निकायलाई सक्रिय हुन आग्रह गरिन्। उनको भनाइमा, गलत सूचना र नक्कली पोस्टरमार्फत जनमानसमा भ्रम सिर्जना गर्ने कार्य लोकतान्त्रिक अभ्यास र स्वस्थ राजनीतिक संस्कृतिका लागि चुनौतीपूर्ण भएकाले दोषीलाई कानुनी दायरामा ल्याउन आवश्यक छ।
