एस् ए एन् एन् न्यूज
बाजुराका चार नगरपालिका र पाँच गाउँपालिकाका नगर उपप्रमुख र गाउँपालिकाका उपाध्यक्षले आर्थिक वर्ष २०८३र८४ का लागि बुधबार बजेट प्रस्तुत गरेका छन् । उक्त निकायले सदरमुकाम मार्तडीमा शिक्षा, कृषि, स्वास्थ्य र पूर्वाधारमा जोड दिँदै बजेट नगर तथा गाउँसभामा सार्वजनिक गरेका हुन् । बडीमालिका नगरपालिकाका उपप्रमुख नन्दाकुमारी थापाले आव २०८३/८४ का लागि रु ५१ करोड ६९ लाख १९ हजारको बजेट सभामा प्रस्तुत गरेको छ ।
बुढीगङ्गा नगरपालिकाकी उपप्रमुख माया खड्का (कुँवर) ले आव २०८३/८४ का लागि रु ५६ करोड ५७ लाख १४ हजार बजेट सभामा पेस गरे। त्रिवेणी नगरपालिकाले रु ५४ करोड ९५ लाख ७२ हजारको बजेट सभामा प्रस्तुत गरे । सभामा नगर उपप्रमुख कमलाकुमारी जैशी (न्यौपाने) ले चालुतर्फ रु ३५ करोड १८ लाख ४४ हजार र पुँजीगततर्फ रु १९ करोड ७७ लाख २८ हजार बजेट जाहेर गरेको हो ।
बुढीनन्दा नगरपालिकाले पनि रु ५७ करोड छ लाख ९६ हजार बजेट सभामा प्रस्तुत गरेको छ । नगर उपप्रमुख रामबहादुर बोहराले चालुतर्फ रु ३७ करोड ९४ लाख ४८ हजार र पुँजीगततर्फ रु १९ करोड, आठ लाख ४८ हजार विनियोजन गरेको हो । हिमाली गाउँपालिकाका उपाध्यक्ष राजकला सार्कीले आव २०८३र८४ का लागि रु ४३ करोड ६८ लाख ३९ हजार बजेट पेस गरे । उनले पुँजीगततर्फ रु १८ करोड एक हजार र चालुतर्फ रु २५ करोड ६८ लाख २१ हजार प्रस्तुत गरेको हो ।
स्वामीकार्तिक खापर गाउँपालिकाका उपाध्यक्ष सुलोचनाकुमारी भण्डारी (बुढा) ले रु ४४ करोड १६ लाख दुई हजार बजेट गाउँसभामा प्रस्तुत गरेको छ । जगन्नाथ गाउँपालिकाले रु ३८ करोड ६३ लाखको बजेट प्रस्तुत गरेको छ । गाउँपालिकाले चालुतर्फ रु २३ करोड ६८ लाख १० हजार ५०० र पुँजीगततर्फ रु १४ करोड ९४ लाख ९० हजार ५०० विनियोजन गरेको छ । खप्तड छेडेदह गाउँपालिका उपाध्यक्ष विसुदेवीनाथले आव २०८३/८४ का लागि सभामा रु ५३ करोड १५ लाख ६९ हजारको बजेट पेस गरेको छ ।
गौमूल गाउँपालिकाका उपाध्यक्ष सीता थापाले आव २०८३/८४ का लागि रु ४० करोड ३१ लाख २९ हजार बजेट गाउँसभामा प्रस्तुत गरे । थापाले गाउँसभामा चालुतर्फ रु २८ करोड ६० लाख २७ हजार र पुँजीगततर्फ रु ११ करोड ७१ लाख दुई हजारको बजेट पेस गरेको हो ।
सभामा प्रस्तुत गरिएका सबै स्थानीय तहका बजेटले शिक्षा, स्वास्थ्य, कृषि, पूर्वाधार विकास, पर्यटन लगायतमा जोड दिइएको छ ।
