एस् ए एन् एन् न्यूज
मुगुको एक गाउँमा शनिबार राति भरुवा बन्दुकसहित करिब नौ जनाको समूह गाउँमा पसेर स्थानीयलाई तर्साएर लुटपाट गरेको जिल्ला प्रहरी कार्यालय मुगुले जनाएको छ । मुगुको मुगमकार्मारोङ गाउँपालिका–२ डोल्फु गाउँमा हतियारसहितको समूह पसेर लुटपाट गरेको हो ।
मुगु प्रहरीका अनुसार उक्त स्थानमा सुरक्षाको लागि आइतबार नै जिल्लाबाट प्रहरी हिडेको छ । स्थानीयहरु यार्सागुम्बा टिप्न गएका बेला गाउँमा ८–९ जनाको समूह गएर घरहरुमा लुटपाट गरेको खबर आएकोले त्यसतर्फ प्रहरी टोली पुगिसकेको जनाइएको छ । लुटेरा समूहले भरुवा बन्दुक देखाएर घरमा लुटपाट गरेको प्रहरीले जनाएको छ ।
घटना भएको डोल्फु गाउँ सदरमुकामदेखि साढे दुई दिनको पैदल दूरीमा पर्छ । युवाहरु यार्सागुम्बा टिप्न पाटन गएको र घरमा बुढापाका मात्र भएको मौका छोपेर लुटेरा समूह गाउँ पसेको बताइएको छ । साथै, लुटेरा समूहले घरमा भएका कुकुरहरुलाई गोली हानेर मारिदिएको समेत गाउँलेले खबर गरेका छन् ।
