एस् ए एन् एन् न्यूजपशुपति क्षेत्र विकास कोषले पशुपतिनाथ मन्दिर ट्रष्टको जग्गा अतिक्रमण गरी निर्माण गरिएका व्यक्तिको घर तथा अन्य भौतिक संरचना हटाउने भएको छ । काठमाडौं महानगरपालिकाको प्राविधिक टोलीले कोससँग मिलेर त्यस्ता घर र संरचनाको सीमाङ्कनसहित खोजी गरिरहेको कोषका प्रवक्ता रेवती रमण अधिकारीले जनाए ।
उनले भने, ‘कामपाको प्राविधिक टोलीको सहयोगमा गत शुक्रबारदेखि यस्ता संरचनाको पहिचान र सिमाङ्कन सुरु गरेका छौँ, एक–दुई दिनमा यो काम सम्पन्न हुन्छ । सार्वजनिक जग्गा अतिक्रमण गरेर निर्माण गरिएका संरचना भत्काइने छ ।’ कामपा–८ को गाँचापोखरीमा ३ रोपनी, ६ आना १ पैसा जग्गा, कामपा–३ को भगवान्स्थानमा तीन रोपनी ८ आना जग्गा र लामा पोखरी सिफलमा केही जग्गा अतिक्रमण गरी अवैध संरचना निर्माण गरेको पाइएको जनाइएको छ ।
कोषका अध्यक्ष एवं संस्कृति, पर्यटन तथा नागरिक उड्डयनमन्त्री सुदन किरातीले पशुपति क्षेत्रको जग्गा अतिक्रमण गरी निर्माण गरिएका अवैध संरचना हटाउन कोष र र काठमाडौं महानगरपालिकालाई निर्देशन दिएका छन् । कोषको बोर्ड बैठक गत माघ १६ गते बसेको बैठकले यस सम्बन्धमा निर्णय गरेको हो ।
