एस् ए एन् एन् न्यूज
काजु उपनामले चर्चित आफूलाई वरिष्ठ पत्रकार भन्न रुचाउने रेडियो टेलिभिजन कार्यक्रम प्रस्तोता तथा रिपोर्टस क्लब नेपालका अध्यक्ष ऋषि धमला सार्वजनिक संचारमाध्यममार्फत देशका विभिन्न व्यक्तित्वलाई अर्ति उपदेश दिइरहेका हुन्छन् । बौद्धिकतादेखि जिम्मेवारीसम्म, राजनीतिदेखि अध्यात्मसम्म, गीत–संगीतदेखि साहित्य सृजनासम्म सबै विधाका आफूलाई ज्ञाता मान्ने ऋषि धमला सबैलाई नैतिकताको पाठ पढाइरहेका हुन्छन् ।
तिनै ऋषि धमला आफूले राज्यलाई तिर्नुपर्ने दायित्वको विषयमा कुरा उठ्यो कि हमला गरि हाल्छन् । विगतमा अवैध कारोवारदेखि फिरौतीसम्मको धन्दामा संलग्नताको आरोप लागेका ऋषि धमला आफूलाई पक्का गणतन्त्रवादी र आफैले गणतन्त्र ल्याएको वेतुकको तर्क अघि सार्न पनि पछि पर्दैनन् ।
यिनै ऋषि धमलाले संचालन गरेको रिपोर्टस क्लब नेपाल स्थापनाको २६ वर्षमा प्रवेश गरेको छ । स्थापनाको २५ वर्ष पूरा गरेको रिपोर्टस क्लबले राज्यलाई तिर्नुपर्ने दायित्व वापतको झण्डै एक करोड रुपैयाँ राज्यलाई नतिरी अझ आफै ठूलो कुरा गर्दै हिडिरहेका छन् ।
यस सम्बन्धमा समाज कल्याण परिषद्ले रिपोर्टस क्लबको नाममा ३५ दिने सार्वजनिक सूचनानै प्रकाशित गरिसकेको छ । २०७२ सालपछि प्रधानमन्त्री सुशील कोइरालाको प्रत्यक्ष निर्देशनमा समाज कल्याण परिषदले भृकुटी मण्डपको सरकारी जग्गा रिपोर्टस क्लबलाई भाडामा दिएको थियो । २०७२ सालदेखि रिपोर्टस क्लबले हालसम्म सरकारलाई एक पैसा तिरेको छैन, बरु नेपाल सरकार संचार मन्त्रालयबाट सहयोग स्वरुप करोडौं रुपैयाँ बुझेको छ ।
संचारलगायत विभिन्न मन्त्रालयबाट वर्षेनी करोडौं रुपैयाँ सहयोग लिने, वर्षेनी करोडौंको विज्ञापन उठाउने रिपोर्टस क्लबले भाडा भने तिर्नु नपर्ने रहेछ भनि संचार वृत्तमा चर्चा चलेको छ । कतै नेपाली समाजमा प्रचालित उखान ‘जो चोर उसको ठूलो स्वर’ चरितार्थ त भइरहेको छैन ? सम्बन्धित निकायको ध्यान पुगोस् ।
