एस् ए एन् एन् न्यूज
पूर्वप्रधानमन्त्री तथा नेपाल समाजवादी पार्टी (नयाँ शक्ति)का अध्यक्ष डा. बाबुराम भट्टराईले बुधबार अप्रत्यासित रुपमा पद त्याग गरेको घोषणा गरेको छ ।
दीपज्योती बैङ्क्वेट बौद्धमा आज बसेको नेसपा (नयाँ शक्ति)को केन्द्रीय समितिको विशेष विस्तारित बैठकमा अध्यक्ष डा भट्टराईले पदत्याग गर्ने प्रस्ताव पेस गर्नुभएको र केन्द्रीय समितीद्वारा स्वीकृत गरेको सो पार्टीका प्रवक्ता कृष्ण शर्माले जानकारी दिए। उनले भने, “अध्यक्ष भट्टराईको पदत्याग गर्ने प्रस्ताव केन्द्रीय समितीद्वारा स्वीकृत भएको छ । पार्टीका उपाध्यक्ष दुर्गा सोवको अध्यक्षतामा महाधिवेशन आयोजक समिति बनाउने निर्णय गरिको छ ।”
महाधिवेशनसम्मको निम्ति उपाध्यक्ष दुर्गा सोबलाई संयोजक र महासचिव सोनामसिंह स्याङ्तानलाई सदस्य सचिव तथा पार्टी प्रवक्तामा कृष्ण शर्मालाई तोकिएको सो पार्टीका केन्द्रीय सदस्य टङ्क धमलाले बताए । उहाँका अनुसार नेसपा (नयाँ शक्ति) ले आउँदो फागुन महिनासम्ममा आफ्नो पार्टीको विशेष महाधिवेशन गर्ने तयारी गरेको छ ।
भदौ २३ र २४ गते जेनजी विद्रोहले नेपालको शासनप्रणाली नै पल्ट्याइदिएपछि हरेक राजनीतिक दलहरूमा पार्टी पुनर्गठनको बहस चलिरहेको छ ।जेनजी विद्रोहको परकम्पपछि भट्टराईले केन्द्रीय समितिको आकस्मिक बैठक बोलाएका थिए । बैठकमा भट्टराईले आफू नेतृत्वको वैकल्पिक नयाँ शक्तिले उठाउँदै आएको विषय जेनजी विद्रोहले साकार पारेको बताएका थिए । सम्बोधनको अन्त्यमा उनले जेनजी विद्रोहले राजनीतिमा रुपान्तरण खोजेको भन्दै नयाँ वैकल्पिक शक्ति निर्माणका लागि पद त्याग गरेको घोषणा गरेका हुन् ।
