एस् ए एन् एन् न्यूज
काठमाडौँ । नेपाली कांग्रेसको २०७८ मंसिरमा भएको १४औँ महाधिवेशनपछि शेरबहादुर देउवाको सभापतित्वमा गठित केन्द्रीय कार्यसमितिका ३ पदाधिकारीसहित केन्द्रीय समितिमा रहेका ३२ जना गगन थापा नेतृत्वमा गठित नयाँ कार्यसमितिमा गएका छन् ।
काठमाडौँको भृकुटीमण्डपमा पुस २७ देखि ३० गतेसम्म भएको विशेष महाधिवेशनले थापाको सभापतित्वमा सर्वसम्मत चयन गरेको १३५ सदस्यीय केन्द्रीय समितिमा देउवा नेतृत्वको केन्द्रीय समितिमा रहेका ३२ जना गएका हुन् ।
देउवा नेतृत्वको समितिमा रहेका महामन्त्रीद्वय थापा र विश्वप्रकाश शर्मा विशेष महाधिवेशनबाट निर्वाचित केन्द्रीय समितिमा गएका छन् । थापा सभापति र शर्मा उपसभापति चयन भएका छन् । सहमहामन्त्री फरमुल्लाह मन्सुरले नयाँ कार्यसमितिमा पनि पुरानै पद पाएका छन् ।
थापा नेतृत्वको समितिमा अर्को उपसभापति बनेकी पुष्पा भुसाल भने देउवा नेतृत्वको समितिमा केन्द्रीय सदस्य थिइन् ।
देउवा नेतृत्वको समितिमा केन्द्रीय सदस्य रहेका प्रदीप पौडेल नवनिर्वाचित कार्यसमितिको महामन्त्री बनेका छन् । उनी कांग्रेसको १४औँ महाधिवेशनमा महामन्त्रीको उम्मेदवार बनेर पराजित भएका थिए । उनी २०७९ सालमा भएको प्रतिनिधि सभा निर्वाचनमा काठमाडौँ–५ बाट निर्वाचित भएपछि उनी पार्टीको संसदीय दलको नेताको निर्वाचनकै क्रममा थापासँग निकट भएका थिए ।
थापा नेतृत्वको कार्यसमितिमा मन्सुरबाहेक निर्विरोध चयन भएका अन्य सात सहमहामन्त्री देउवा नेतृत्वको कार्यसमितिका केन्द्रीय सदस्य थिए । सहमहामन्त्रीमा निर्विरोध चयन भएका डा. डिला संग्रौला पन्त, प्रकाश रसाइली स्नेही, बहादुरसिंह लामा, उदय शमशेर राणा, मुक्ताकुमारी यादव, योगेन्द्र चौधरी र कर्णबहादुर बुढा केन्द्रीय सदस्य थिए ।
देउवा नेतृत्वको केन्द्रीय समितिका २० केन्द्रीय सदस्य थापा नेतृत्वको समितिमा पनि केन्द्रीय सदस्य नै छन् । थापा नेतृत्वको समितिमा गोपालमान श्रेष्ठ, अर्जुननरसिंह केसी, राजेन्द्र केसी, अर्जुनप्रसाद जोशी, चिनकाजी श्रेष्ठ, भरत शाह, मधु आचार्य, अमृत अर्याल, ध्रुब वाग्ले, विनोद चौधरी, मोहन आचार्य, अजयबाबु सिवाकोटी, जानकी सिंह, नानु बास्तोला, धना खतिवडा, प्रतिमा गौतम, तारामान गुरुङ, अब्दुल सत्तार, अब्दुल रज्जाक र गोपाल दहित सदस्य बनेका छन् ।
