एस् ए एन् एन् न्यूज
रास्वपा सांसद अमरेशकुमार सिंहले सरकारले ल्याएको बजेट फुकेको बेलुनजस्तो भएको टिप्पणी गरेको छन् । बजेटमाथिको छलफलमा भाग लिँदै उनले बजेटले आन्तरिक उत्पादन गर्नेभन्दा ऋण लिएर बजेट तन्काएको बताएका हुन् ।
‘कर्मचारीले २१ प्रतिशत बढेको तलब पाए । तीन करोडमा कर्मचारी कति लाख छन् ? गरिबले के पायो ? मेरो चिन्ता मुसहर, गरिब चेपाङ र गरिब बस्तीमा छ । जुम्लाको स्याउलाई कसरी बजारमा लाने, उत्पादन बढाउने भन्नेमा छ,’ अमरेशले भने, ‘तर वैदेशिक रोजगारको रेमिटेन्समा देश चलेको छ । तर सरकारले ल्याएको बजेट फुकेको बेलुन हो लामो समय टिक्दैन । बजेट कसरी कार्यान्वयन हुन्छ भन्ने विश्वास छैन ।’
झाण्डै सात खर्बको घाटाको बजेट आएको भन्दै ऋण तिर्दा विकास नै नहुने उनले बताए । ‘झण्डै सात खर्बको घाटाको बजेट आएको छ । एउटाको ऋण तिर्न अर्कोसँग ऋण लिने अवस्था छ । साढे चार खर्ब आन्तरिक ऋण लिने तर साढे तीन खर्ब ऋण तिर्नमा प्रयोग भएपछि अनि कहाँबाट विकास हुन्छ ?,’ अमरेशले भने, ‘बजेट बनेको भोलिपल्ट नेपाल साउथ कोरिया, जापान हुन्छ ?’
