एस् ए एन् एन् न्यूज
नेपाली काँग्रेसका नेता डा। शशांक कोईरालाले पार्टीको आन्तरिक एकता सुदृढ बनाउनु आफ्नो प्रमुख दायित्व भएको बताएको छ । शुक्रवारदेखि शुरु भएको संस्थापन इतर पक्षको राष्ट्रिय भेलालाई सम्बोधन गर्दै उहाँले काँग्रेस एकीकृत भएको खण्डमा कसैले पनि पराजित गर्न नसक्ने दाबी गरेको हो । सम्बोधनका क्रममा डा। कोईरालाले पार्टी पूर्वसभापति शेरबहादुर देउवासँगका पुराना र ऐतिहासिक प्रसङ्गहरू स्मरण गरे ।
वीपी कोईरालाले देउवालाई ‘पश्चिमको राजकुमार’ भन्ने गरेको उल्लेख गर्दै उहाँले बनारसमा रहँदाका स्मृतिहरू साझा गरे । वीपीको निर्देशनमा आफूले देउवालाई बनारस घुमाएको र त्यस क्रममा हेरिएका चलचित्रहरूका बारेमा देउवाले देखाएको सुक्ष्म र हुबहु विश्लेषणबाट आफू प्रभावित भएको कोईरालाले बताए । पार्टीको ऐतिहासिक कालखण्डको चर्चा गर्दै डा। कोइरालाले भने, ‘लोकतन्त्रको आगमनपछि तत्कालीन नेता गिरिजाप्रसाद कोईरालाको आग्रहमा लण्डनबाट फर्किएलगत्तै शेरबहादुर जी प्रधानमन्त्री बने । उनी अत्यन्त भाग्यमानी र प्रभावशाली नेता हुन्। शेरबहादुर जी नै हाम्रो नेता र सभापति छन्, उनकै नेतृत्वमा नेपाली काँग्रेस अगाडि बढ्छ ।’
संस्थापन इतर समूहको भेला भएपनि डा। कोईरालाले देउवाको नेतृत्वप्रति पूर्ण समर्थन व्यक्त गरे । देउवाको उपस्थितिले नै कार्यक्रम सफल हुने विश्वास व्यक्त गरे । देशभरका विभिन्न जिल्लाबाट सहभागी हुन आएका कार्यकर्ताहरूलाई स्वागत गर्दै कोईरालाले कार्यक्रम व्यवस्थापनमा भएका कमीकमजोरीप्रति क्षमायाचना समेत गरे । उनले पार्टीभित्रको उत्साह र एकताले नै काँग्रेसको भविष्य सुनिश्चित गर्नेमा जोड दिए ।
