South Asian News Network

पोखरामा आगामी अप्रिल २७ मा एसियन कप र साउथ एसियाली ट्रायथलन च्याम्पियनसिप आयोजना हुन लागेको हो ।यस लेक सिटीमा २०११ देखि च्याम्पियनसिप आयोजना हुँदै आएको छ भने कोभिड–१९ को महामारीका कारण दुई वर्ष बाहेक नियमित रुपमा आयोजना हुँदै आएको छ । खेलकुद कार्यक्रम स्थानीय लेकसाइडमा हुनेछ। च्याम्पियनसिपको आयोजक नेपाल ट्रायथलन संघ हो । इन्टरनेशनल ट्रायथलन युनियनले यसअघि नै आफ्नो आधिकारिक वेबसाइटमा च्याम्पियनसिपको मिति पोस्ट गरिसकेको संघका अध्यक्ष निलेन्द्रराज श्रेष्ठले जानकारी दिए । उनले च्याम्पियनसिपअन्तर्गत स्प्रिन्ट इभेन्टतर्फ प्रतिस्पर्धा हुने बताए । गत वर्ष भएको च्याम्पियनसिपमा १८ देशका ५३ खेलाडीले भाग लिएका थिए । स्प्रिन्ट प्रतियोगितामा फेवातालमा ७५० मिटर पौडी, २० किलोमिटर साइक्लिङ र पाँच किलोमिटर दौड हुनेछ । लामो दूरीको दौड गौरीघाट–शहिदचोक, मुस्ताङ चोक, बिरौटा चोक, दमसाइड हुँदै राष्ट्र बैंक चोक हुँदै गौरीघाटसम्म हुने श्रेष्ठले बताए । च्याम्पियनसिपको तयारी सुरु भएको छ ।