एस् ए एन् एन् न्यूज
उपेन्द्र यादव नेतृत्वको जनता समाजवादी पार्टी जसपाले यही जेठ २८ गते जनकपुरमा हुने प्रथम राष्ट्रिय महाधिवेशनमा २० हजार मान्छेको उपस्थित रहने आयोजकले जनाएको छ ।
जसपाको प्रवक्ता मनीष सुमनका अनुसार केन्द्रका नेताहरू नेकपा एकीकृत समाजवादीका अध्यक्ष माधव नेपाल र नेकपा महासचिव नेत्रविक्रम चन्द्र विप्लव महाधिवेशनमा आउने भएको छ ।
एमाले अध्यक्ष केपी ओली, प्रधानमन्त्री तथा माओवादी अध्यक्ष पुष्पकमल दाहाल, राष्ट्रिय स्वतन्त्र पार्टीका सभापति रवि लामिछाने र जनमतका अध्यक्ष सिके राउतलाई निमन्त्रणा पठाइसकेको बताइएको छ । तर उनीहरूले कार्यक्रममा आउने या नआउने निर्णय नगरेको बताइन्छ ।
उनीहरूको भोलि मात्र निर्णय हुने बताइएको छ । यस्तै, फागुन २३ मा जसपा विभाजन गरेका अशोक राईको समूहलाई भने महाधिवेशनमा नबोलाउने सुमनको भनाइ छ । उनले भने, ‘उनीहरूलाई बोलाएर के पाइन्छ । पार्टी हो र उनाीहरुको ?’ सुमनका अनुसार भारतका समाजवादी नेताहरूलाई समेत निमन्त्रणा दिएको छ ।
जसपा नेपालको केन्द्रीय समितिको निर्वाचन जेठ ३० गते हुनेछ । पार्टीको केन्द्रीय निर्वाचन तदर्थ समितिले राष्ट्रिय महाधिवेशनबाट निर्वाचित हुने केन्द्रीय समितिको निर्वाचन कार्यपालिका तयार गरिसकेको छ ।
कार्य तालिकाअनुसार जेठ २८ गते दिनको १ बजे मतदाताको नामावली प्रकाशित, जेठ २९ गते बिहान १० बजेदेखि १२ बजेसम्म उम्मेदवारको मनोनयन दर्ता हुने जसपा नेपालका केन्द्रीय प्रचार प्रसार तथा प्रकाशन विभाग प्रमुख पूर्ण बस्नेतले जानकारी दिएका छन् ।
बस्नेतले सोही दिन १२ बजेदेखि २ बजेसम्म मनोनयपत्र माथि पर्ने दाबी विरोध दर्ता गर्ने, जाँचबुझ गर्ने कार्य हुने र त्यसै दिन ४ बजेसम्म सोउपर निर्णय गरिने जानकारी दिए । उनका अनुसार जेठ ३० गते बिहान ८ बजेदेखि साँझ ५ बजेसम्म मतदान कार्य हुनेछ । केन्द्रीय समितिको निर्वाचन सकिएपछि सबै पदको लागि मतगणना एकै पटक हुने सुमनको भनाइ छ ।
