एस् ए एन् एन् न्यूज
वैदेशिक रोजगारीमा जाने नेपाली श्रमिकका लागि श्रम स्वीकृति प्रक्रिया अब थप सहज र छिटो हुने भएको छ। सरकारले आजदेखि आवेदन दिएको दिनमै श्रम स्वीकृति दिने व्यवस्था लागू गरेको छ, जसले लामो समयदेखि रहेको झन्झटिलो प्रक्रिया अन्त्य गर्ने अपेक्षा गरिएको छ। यसअघि दैनिक सीमित संख्यामा टोकन प्रणालीमार्फत श्रम स्वीकृति प्रदान गरिँदै आएको थियो। तर अब उक्त प्रणाली हटाइएको छ। श्रम, रोजगार तथा सामाजिक सुरक्षा मन्त्रालय को निर्देशनअनुसार वैदेशिक रोजगार विभाग ले आवेदन दिएकै दिन स्वीकृति दिने व्यवस्था कार्यान्वयनमा ल्याएको हो। विभागका अनुसार आवश्यक कागजात पूरा भएमा सोही दिन नयाँ श्रम स्वीकृति र पुनः श्रम स्वीकृति दुवै प्रदान गरिनेछ। यसले सेवाग्राहीलाई लाइन बस्नुपर्ने, पालो कुर्नुपर्ने र अनावश्यक ढिलाइ झेल्नुपर्ने अवस्थाको अन्त्य गर्ने विश्वास गरिएको छ।
यस सुधारको निर्णय दिपक कुमार साह को उपस्थितिमा आइतबार बसेको बैठकबाट भएको हो। बैठकमा श्रम तथा रोजगार क्षेत्रलाई व्यवस्थित, मर्यादित र सुरक्षित बनाउने लक्ष्यसहित विभिन्न सुधारका कार्यक्रम अघि बढाउने सहमति गरिएको थियो। सरकारले चैत १३ गते सार्वजनिक गरेको शासकीय सुधारसम्बन्धी १०० कार्यसूचीअन्तर्गत यो कदम चालिएको हो। श्रमिकको हकहित संरक्षण गर्दै वैदेशिक रोजगार प्रक्रियालाई थप पारदर्शी र प्रभावकारी बनाउने उद्देश्यले यस्तो व्यवस्था लागू गरिएको मन्त्रालयले जनाएको छ।
