एस् ए एन् एन् न्यूज
लुम्बिनी प्रदेशमा सरकार गठन तथा राजनीतिक सहकार्यका लागि एमाले अध्यक्ष केपी शर्मा ओली र नेकपाका संयोजक पुष्पकमल दाहालले नेकपा मसालसँग दुई बुँदे सहमति गरेका छन् ।
एमाले अध्यक्ष केपी शर्मा ओली, नेकपाका संयोजक पुष्पकमल दाहाल ‘प्रचण्ड’ र नेकपा (मसाल)का महामन्त्री मोहनविक्रम सिंहबीच भएको छलफलपछि सहमति पत्रमा हस्ताक्षर गरिएको हो। सहमतिअनुसार लुम्बिनी प्रदेश सरकार गठन तथा प्रदेशको विकास निर्माणका काममा तीन दलबीच सहकार्य गरिनेछ।
त्यस्तै, राष्ट्रिय स्वाधीनता, संविधान र गणतन्त्रको पक्षमा तथा प्रतिगमनका विरुद्ध हुने आन्दोलनमा समेत सहकार्य गर्ने सहमति भएको छ।
लुम्बिनी प्रदेशसभामा नेकपा (मसाल)को एक सांसद रहेका छन्। उनको समर्थन सरकार गठनका लागि महत्वपूर्ण मानिएको छ। यही कारण एमाले र नेकपाले मसालसँग सहकार्यको समझदारी अघि बढाएका हुन्।
सहमतिको यो निर्णयसँगै लुम्बिनी प्रदेशको सत्ता समीकरणमा नयाँ राजनीतिक ध्रुवीकरण देखिएको छ। प्रदेश सरकार गठनसँगै विकास निर्माण र राष्ट्रिय राजनीतिक मुद्दामा समेत तीन दलबीच सहकार्यको बाटो खुलेको छ।
