एस् ए एन् एन् न्यूज
प्रमुख प्रतिपक्षी दल नेपाली कांग्रेसले भोटेकोशी र त्रिशूली नदी क्षेत्रमा आएको बाढीपछि देखिएका विपद् व्यवस्थापनका समस्याप्रति सरकारको ध्यानाकर्षण गराएको छ। कांग्रेस संसदीय दलका नेता भीष्मराज आङ्देम्बेले बाढीमा परी ज्यान गुमाएका व्यक्तिहरूको शव व्यवस्थापन गर्दा आफन्तको अनुमति नलिइएको विषयलाई गम्भीर रूपमा उठाएका छन्। पार्टी केन्द्रीय कार्यालय सानेपामा आयोजित छलफल कार्यक्रममा बोल्दै आङ्देम्बेले विपद्का बेला शव व्यवस्थापनजस्तो संवेदनशील विषयमा सम्बन्धित परिवारको भावनालाई समेत ध्यान दिनुपर्ने बताए। उनका अनुसार आफन्तको अनुमति नलिइएको विषयमा गुनासो प्राप्त भएको छ।
त्यसैगरी, बाढीपछि भोटेकोशी र त्रिशूली नदी आसपास फैलिएको दुर्गन्धले जनस्वास्थ्यमा गम्भीर असर पार्न सक्ने भन्दै कांग्रेसले तत्काल आवश्यक कदम चाल्न सरकारलाई आग्रह गरेको छ। आङ्देम्बेका अनुसार उनले यस विषयमा प्रधानमन्त्रीको समेत ध्यानाकर्षण गराइसकेका छन्। स्थानीय तहका जनप्रतिनिधि तथा अन्य सरोकारवालासँग छलफल गरी प्राप्त सुझावका आधारमा प्रधानमन्त्रीसमक्ष ९ बुँदे ध्यानाकर्षणपत्र बुझाइएको उनले जानकारी दिए।
उनले बाढी प्रभावित क्षेत्रमा तत्कालीन राहतसँगै पुनःस्थापना र दीर्घकालीन व्यवस्थापनलाई प्राथमिकतामा राख्नुपर्ने बताए। आङ्देम्बेले भने, “शव व्यवस्थापन गर्दा आफन्तको अनुमति नलिएको विषय पनि गम्भीर रूपमा उठेको छ । भोटेकोशी र त्रिशूली नदी क्षेत्रमा फैलिएको दुर्गन्ध पनि हाम्रो लागि ठूलो चुनौती बनेको छ।”
उनका अनुसार स्थानीय तहका नेता तथा सम्पर्कमा रहेका सरोकारवालाबाट प्राप्त सुझाव समेटेर सरकारलाई ९ बुँदामा ध्यानाकर्षण गराइएको हो। कांग्रेसले विपद्पछिको राहत वितरणदेखि प्रभावितको पुनःस्थापना र भविष्यमा यस्ता विपद्बाट हुने क्षति न्यूनीकरणसम्मका विषयमा सरकारको प्रभावकारी भूमिका आवश्यक रहेको जनाएको छ।
