एस् ए एन् एन् न्यूज
नेपाली कांग्रेसका नवनिर्वाचित सभापति गगनकुमार थापाले आगामी प्रतिनिधिसभा निर्वाचनमा नयाँ क्षेत्रबाट प्रत्यक्ष प्रतिस्पर्धा गर्ने निर्णय गरेका छन्। यसपटक उनले आफ्नो पुरानो क्षेत्र काठमाडौं-४ छाड्दै सर्लाही-४ रोजेका हुन्। सर्लाही-४ मा थापा कांग्रेसका अनुभवी नेता डा. अमरेशकुमार सिंहसँग चुनावी मैदानमा उत्रिने भएका छन्।
२०७९ को निर्वाचनमा कांग्रेसबाट टिकट नपाएपछि सिंहले स्वतन्त्र उम्मेदवारी दिएर २० हजार १७ मतसहित प्रतिनिधिसभा सदस्यमा निर्वाचित भएका थिए। हालै मात्र सिंह राष्ट्रिय स्वतन्त्र पार्टी (रास्वपा) प्रवेश गरेका छन्। यस क्षेत्रमा अन्य दलहरूले पनि बलिया उम्मेदवार अघि सारेका छन्। नेकपा एमालेबाट रविसिंह कुशवाहा र नेपाली कम्युनिस्ट पार्टीबाट डा. रगनिस राय यादव चुनावी प्रतिस्पर्धामा छन्।
अघिल्लो निर्वाचनमा पनि गगन थापा सर्लाही-४ बाट उम्मेदवार बन्ने चर्चा चलेको थियो। त्यसबेला टिकट नपाएपछि सिंहले थापाकै कारण आफू वञ्चित भएको आरोप लगाएका थिए। उक्त निर्वाचनमा सिंहका निकटतम प्रतिद्वन्द्वी कांग्रेस उम्मेदवार नागेन्द्र कुमारले १८ हजार २५३ मत प्राप्त गरेका थिए, जसलाई माओवादी केन्द्र र एकीकृत समाजवादीको समर्थन थियो। यसपटक सर्लाही-४ को चुनावी समीकरण फेरिँदा प्रतिस्पर्धा थप रोचक हुने देखिएको छ।
