एस् ए एन् एन् न्यूज
प्रतिनिधिसभाको उपसभामुख चयनका लागि आज भएको मनोनयनले राजनीतिक समीकरणमा नयाँ मोड ल्याएको छ।
अपेक्षाविपरीत अन्तिम क्षणमा सत्ता पक्षको समर्थन एकातिर केन्द्रित हुँदा प्रतिस्पर्धा थप रोचक बनेको हो। उपसभामुख पदका लागि श्रम संस्कृति पार्टीबाट रूविकुमारी ठाकुर र राष्ट्रिय प्रजातन्त्र पार्टी (राप्रपा)बाट सरस्वती लामा मैदानमा उत्रिएका छन्। दुवै प्रतिपक्षी दलका उम्मेदवार भए पनि सत्तारूढ राष्ट्रिय स्वतन्त्र पार्टी (रास्वपा) को निर्णयले चुनावी गणितमा स्पष्ट प्रभाव पारेको छ। रास्वपाले अन्ततः श्रम संस्कृति पार्टीकी उम्मेदवार ठाकुरलाई समर्थन गर्ने निर्णय गरेको छ। पार्टी प्रवक्ता मनिष झाले का अनुसार यो निर्णय संवैधानिक सन्तुलन र राजनीतिक आवश्यकतालाई ध्यानमा राखेर गरिएको हो।
ठाकुरको उम्मेदवारीमा श्रम संस्कृतिका सांसद आरेन राई प्रस्तावक र रास्वपाका अशोककुमार चौधरी समर्थक बनेका छन्, जसले सत्ता पक्षको झुकाव प्रस्ट देखाएको छ। यता, राप्रपाकी उम्मेदवार लामाको प्रस्ताव र समर्थन आफ्नै दलभित्रबाट आएको छ। रोचक कुरा के छ भने, यसअघि राप्रपा संसदीय दलका नेता ज्ञानेन्द्रबहादुर शाही ले रास्वपाले आफ्नो उम्मेदवारलाई समर्थन गर्ने बताएका थिए। उनले रास्वपा सभापति रवि लामिछाने सँग भएको संवादका आधारमा यस्तो दाबी गरेका थिए। तर अन्तिम निर्णय भने फरक दिशामा गएको छ।
प्रतिनिधिसभामा श्रम संस्कृतिका ७ र राप्रपाका ५ सांसद रहेको अवस्थामा रास्वपाको समर्थन निर्णायक बन्ने देखिएको छ। यसअघि चैत २२ गते रास्वपाका डोलप्रसाद अर्याल निर्विरोध सभामुख निर्वाचित भइसकेका छन्। संवैधानिक व्यवस्थाअनुसार एउटै दलबाट सभामुख र उपसभामुख दुवै पदमा प्रतिनिधित्व हुन नपाउने भएकाले रास्वपाले अर्को दललाई समर्थन गर्नुपर्ने अवस्था थियो। यसरी, अन्तिम क्षणमा बदलिएको सत्ता समीकरणले उपसभामुख चयनलाई अझ चासोको केन्द्र बनाएको छ-अब परिणामले संसद्को शक्ति सन्तुलन कता मोडिन्छ भन्ने प्रश्न पेचिलो बनेको छ।
